قیز قالاسی

آزربایجان وارلیغی و مدنیتی


انس و جن

بار الها سن بیزه وئر بو شیاطیندن نجات

انسانین نسلین کسیب، وئر انسه بو جین دن نجات

بیزدن آنجاق بیر قالیرسا، شیطان آرتیب مین دوغوب

هانسی رؤیا ده گؤروم من، بیر تاپا مین دن نجات

بئش مین ایلدیر بو سلاطینه گرفتار اولموشوق

دین ده گلدی، تاپمادیق بیز بو سلاطین دن نجات

بیر یالانچی دین ده اولموش شیطانین بیر مهره سی

دوغرو بیر دین وئر بیزه وئر بو یالان دین دن نجات

هر دوعا شیطان ائدیر، دونیا اونا آمین دئییر

قوی دوعا قالسین، بیزه سن وئر بو آمین دن نجات

ارسینی تندیرلرین گوودوشلاریندا اویناییر

کیمدی بو گودوشلارا وئرسین بو ارسیندن نجات

یا کرم قیل، کینلی شیطانین الیندن آل بیزی

یا کی شیطانین اؤزون وئر بیرجه بو کین دن نجات

اؤلدورور خلقی، سورا ختمین توتوب یاسین اوخور

بار الها خلقه وئر بو حوققا -یاسین دن نجات

دینه قارشی(بابکی- افشینی) بیر دکان ائدیب

بارالها دینه، بو بابکدن، افشین دن نجات

(ویس و رامین) تک بیزی رسوای خاص و عام ائدیب

ویس ده اولساق، بیزه یارب بو رامین دن نجات

شوروی دن ده نجات اومدوق کی بیر خیر اولمادی

اولماسا چای صاندیغیندا قوی گله چین دن نجات

من تویوق تک، اؤزنینیمده دوستاغام ایللر بویی

بیر خوروز یوللا تاپام من بلکه بو نیندن نجات

«شهریارین» دا عزیزیم بیر توتارلی آهی وار

دشمنی اهریمن اولسون، تاپماز آهین دن نجات

استاد شهریار

+ نوشته شده در  دوشنبه یازدهم آذر 1392ساعت 19:57  توسط دورنا  | 

.....

گرچه چوخالیبدیر، پینه چی، فالچی، دیلنچی

آمما نه دئییم! کشف کرامت یئنه واردی!

مایلدی کفن گئیمه یه، باش یارماغا قارداش

حمد ائیله رم آللاهه او عادت یئنه واردی!

کؤهنلدی دئمم، سؤزلریمیز، مسجیده گئتمم!

قوصصه ائله مه تازه روایت یئنه واردی!

یوخدو تازا سؤز، بیلمه لیسن مرثیه خواندا

معلوم اولونان وحی و رسالت یئنه واردی!

معجز! دئمه دیم من سنه بو سؤزلری یازما!!

اوول واریدی سنده سفاهت، یئنه واردی!


میرزا علی معجز- شبسترلی

+ نوشته شده در  سه شنبه چهاردهم آبان 1392ساعت 19:43  توسط دورنا  | 

بس سنه کیم آغلایاجاق

 

گون گله جک من اولنده چوخ دوداقلار بوزوله جک

حاییف دئیه گوزیاشلاری یاناقلاردان اوزوله جک

قاتار – قاتار میصراعلاریم دوداقلاردا دوزوله جک

آیریلیغیم چوخ اوره یی چالین _ چارپاز داغلایاجاق

          بس سنه کیم آغلایاجاق

 مجنون اولوب قالاسی یام،محبتین چولونده من

حسرتلره دونه سی یم عشق اهلی نین دیلینده من

چیناراولوب بیته سی یم زامانلارین یولوندا من

هئیکل له نن عومروم گونوم عصیرلری حاقلایاجاق

         بس سنه کیم آغلایاجاق

چوخ گزمیشم دوستلاریملا بوداغلارین اته یینده

مین_ مین اولمز خاطیره م وار هر گولونده ،چیچه یینده

نیسگیل لریم چالیندیقجا چوبانلارین توته یینده

یولدان اوتن هریولچونو ایختیارسیز ساخلایاجاق

       بس سنه کیم آغلایاجاق

بیر کوز کیمی اته یینده ساخلار منی داییم کولوم

هر باهار دا چیچک آچار،هرپاییزدا سولان گولوم

بوینون ایه ن بنووشه لرآغلارمنه ظولوم_ظولوم

منیم آرزوم خالقین عشقی،قیریلدیقی تاغلایاجاق

       بس سنه کیم آغلایاجاق

من عشقیدن یارانمیشام جان باغیشلار یارا یاردا

باخ گور نئجه نسیمی تک بابالاریم قالدی داردا

کرم لریم اوردا یاندی،له له لریم قالدی قاردا

واخت گلجک آه _ آمانیم هیجران یولون باغلایاجاق

          بس سنه کیم آغلایاجاق


ستار گول محمدی( ائل شاعیری)

+ نوشته شده در  چهارشنبه هشتم آبان 1392ساعت 20:14  توسط دورنا  | 


ساقیا گردیشه سال باده حمرانی گؤرک!

دردمندیک، بیزه وئر بیر تیکه درمانی گؤرک!

ایستیرم منده هوا اوزره گزم دونیانی!

دور گتیر خاتم یاقوت سلیمانی گؤرک!


حکیم ابوالقاسم نباتی

+ نوشته شده در  دوشنبه ششم آبان 1392ساعت 19:22  توسط دورنا  | 

    

  یئر اوزونده بیر ائویم وار، 

  پنجره سی گونشه. 

  نغمه دئییب، قوشلار قونار، 

  پنجرمه همیشه. 

  یئر اوزونده بیر ائویم وار، 

  مین زحمتله قورموشام. 

  اوردان ایکی کؤرپه قارتال 

  بؤیودوب اوچورموشام. 

  یئر اوزونده بیر ائویم وار، 

  اوجاغی دایم یانار. 

  اونون سؤنمز شعله سیندن 

  اورگیم ایشیقلانار. 

  یئر اوزونده بیر ائویم وار، 

  خاطیره لر مسکنیم. 

  ایلقاریندا دوز اولانا 

  آچیقدیر قاپیم منیم. 

  یئر اوزونده بیر ائویم وار، 

  اوردا نئچه ایللردیر، 

  طالعیی بیر، آرزوسو بیر 

  ایکی شاعیر عؤمر ائدیر. 

  یئر اوزونده بیر ائویم وار، 

  اوردا قمیم، سئوینجیم، 

  اوردان گئدر ال چاتمایان 

  ایللره عؤمور کؤچوم. 

  یئر اوزونده بیر ائویم وار، 

  سانکی خیالا دالمیش. 

  او، منیم چون ان موقددس، 

  ایستی آشییان اولموش. 

  یئر اوزونده بیر ائویم وار، 

  باتماز توفانلار اونا. 

  بینؤوره دن باغلیدیر او، 

  بو وطن تورپاغینا، 

  بو وطن تورپاغینا. 

 

  مدینه گولگون 

+ نوشته شده در  شنبه چهارم آبان 1392ساعت 18:24  توسط دورنا  | 

عشقینیز اولماسین چوروک ساپ کیمی

اللرده گزمه یین گزمه یین بیر کیتاب کیمی

کیمسه نی مست ائدن آل شراب کیمی

آخیب هر باده یه دولمایین قیزلار.

......

مممد  آراز

+ نوشته شده در  پنجشنبه دوم آبان 1392ساعت 23:51  توسط دورنا  | 

نعمت سه ده گؤزل شعیر

شاعیر اولان غمده یئییر

عؤمرو کئچیر بو عادتله

اوغورلو بیر سعادتله

گؤرن منی نه دیر دئییر:

ساچلارينا دوشن بو دن؟

شاعير نه تئز قوجالدين سن.

 

دونن منه اؤز الينده

گول گتيرن بير گلينده

گؤزلرينده مين بير سووال

هئيكل كيمي داياندي لال....

او بخته ور گؤزلرينده

من اوخودوم گؤزلريندن:

شاعير نه تئز قوجالدين سن؟

 

صمد وورغون

 

+ نوشته شده در  چهارشنبه یکم آبان 1392ساعت 17:57  توسط دورنا  | 

 
+ نوشته شده در  سه شنبه سی ام مهر 1392ساعت 23:41  توسط دورنا  | 

گره‌ک گـؤزلــريندن گـؤز اؤرته هرکس                  

قـارغـا يـــوواســـينا يانـاشسا اگــــــر

نييه وطنيمـــی سئومه‌ييـــــــــم ، نييه                    

من ، بير  قارغا دانــــــدا ، اسگييم مـگر

 

دئميــــــرم اوستون  بير نژاددانـام من                         

دئميـرم ائـــــــــللريم  ائللردن  باشدير

منيم ، مسلکيمده ، منيم يــولـــــــومدا                    

ملت لـــر هاميسی دوستو ، قـارداشدير

 

چاپماق ايسته‌ميـــــــرم  من هئچ ملتين                        

نه ديلين ، نـــــــه يئـــرين ، نه ده امه‌يين

تحقير ائتمه‌ييــــــــرم ، هده‌لـــه‌ميــــــرم                 

کئچميشين ، اينــديسين ، يـا ، گله‌جه‌يين

 

آنجاق ، بيــــر سؤزوم وار ، منده اينسانام                    

ديليم وار، خالقيم وار ، يوردوم ، يووام وار

يئـــــردن چيخماميشام  گـــؤبلک کيمی                    

آدامام ، حاققيــــــم وار ، ائليم ، اوبام وار

 

+ نوشته شده در  سه شنبه سی ام مهر 1392ساعت 22:59  توسط دورنا  |